មន្ទីរពេទ្យបង្អែកស្រុកពួក ចេញមុខសុំទោសជាសាធារណៈ ក្រោយរងការរិះគន់រឿងគ្រូពេទ្យប្រើសម្តីមិនសមរម្យលើព្រះសង្ឃ

ខេត្តសៀមរាប៖ ថ្នាក់ដឹកនាំនៃមន្ទីរពេទ្យបង្អែកស្រុកពួក ខេត្តសៀមរាប បានចេញសេចក្តីថ្លែងការណ៍បំភ្លឺ និងសុំទោសជាសាធារណៈជាផ្លូវការហើយ បន្ទាប់ពីមានរលកនៃការរិះគន់យ៉ាងចាស់ដៃពីសំណាក់អ្នកលេងបណ្តាញសង្គម ជុំវិញករណីមន្ត្រីសុខាភិបាលប្រចាំការ បានប្រើប្រាស់ពាក្យសម្តី និងកាយវិការមិនសមរម្យទៅលើព្រះសង្ឃដែលនិមន្តទៅទទួលសេវាព្យាបាលទាំងយប់។

សេចក្តីបំភ្លឺដែលបានធ្វើឡើងនៅថ្ងៃទី១៣ ខែកក្កដា ឆ្នាំ២០២៦ នេះ បានឱ្យដឹងថា កាលពីពេលថ្មីៗនេះ មានការបង្ហោះសាររិះគន់យ៉ាងខ្លាំងនៅលើគណនីហ្វេសប៊ុក (Facebook) របស់ព្រះតេជគុណ ភិក្ខុ ពៅ ចិនរ៉ា ដោយព្រះអង្គបានបញ្ជាក់ថា៖ «កូនសិស្សអាពាធ លោកទៅពេទ្យស្រុកពួក ស្រាប់តែពេទ្យបន្ទោសថា មកមិនដឹងយប់មិនដឹងថ្ងៃ។ ចឹងអាត្មាសុំទោសគ្រូពេទ្យផង ដែលជំងឺលោកឈឺមិនដឹងយប់មិនដឹងថ្ងៃ»។

ក្រោយពីទទួលបានព័ត៌មាន និងការរិះគន់ភ្លាម ថ្នាក់ដឹកនាំមន្ទីរពេទ្យបង្អែកស្រុកពួក បានកោះហៅបុគ្គលិកពាក់ព័ន្ធ រួមមានអ្នកគ្រូពេទ្យ កាយ គិមសាន និងលោកវេជ្ជបណ្ឌិតឯកទេស ខៃ សីលា ដើម្បីធ្វើការសាកសួរ និងធ្វើកំណត់ហេតុស្វែងរកការពិត។

ផ្អែកតាមការសាកសួរ៖

អ្នកគ្រូពេទ្យ កាយ គិមសាន បានបញ្ជាក់ថា ខ្លួនមិនបានដឹងពីប្រវត្តិចុះឈ្មោះ ឬព័ត៌មានលម្អិតមុននោះទេ ប៉ុន្តែនៅពេលឃើញព្រះសង្ឃនិមន្តមកដល់ ខ្លួនបានស្ទុះទៅជួយសម្របសម្រួល និងផ្តល់សេវាភ្លាមៗតាមដែលអាចធ្វើបាន។
លោកគ្រូពេទ្យ ខៃ សីលា បានពន្យល់បន្ថែមថា ដោយសារមានមណ្ឌលសុខភាពនៅជិតតំបន់នោះស្រាប់ លោកក៏បានផ្តល់ដំបូន្មានឱ្យមកពិនិត្យនៅពេលព្រឹក ដែលការណែនាំនេះគឺធ្វើឡើងស្របតាមបច្ចេកទេសវេជ្ជសាស្ត្រ។
ទោះជាយ៉ាងណា ជុំវិញកំហុសឆ្គងផ្នែកទំនាក់ទំនង ខាងមន្ទីរពេទ្យបង្អែកស្រុកពួក បានសង្កត់ធ្ងន់ និងបញ្ជាក់ពីការទទួលខុសត្រូវថា៖

«ក្នុងនាមករុណាខ្ញុំម្ចាស់ជាបុគ្គលិកសុខាភិបាលដែលបានប្រព្រឹត្តទាំងកាយវិការ និងពាក្យសំដីមិនសមរម្យ អំឡុងពេលការផ្តល់សេវាកាលពីយប់មិញ ករុណាខ្ញុំម្ចាស់សូមអភ័យទោស និងសូមខមាទោសចំពោះរាល់កំហុសឆ្គង ឬការប្រើប្រាស់ពាក្យសម្តីណាមួយដែលមិនសមរម្យ ដែលអាចបង្កឱ្យមានការយល់ច្រឡំ ឬប៉ះពាល់ដល់ព្រះទ័យរបស់ព្រះអង្គ»។

ទន្ទឹមនឹងការសុំទោសនេះ ខាងមន្ទីរពេទ្យក៏បានបញ្ជាក់បន្ថែមផងដែរថា សម្រាប់ការពិនិត្យស្ថានភាពជំងឺ និងបច្ចេកទេសវេជ្ជសាស្ត្រ (ដូចជាការពិនិត្យជាតិស្ករ និងវាស់សម្ពាធឈាម) គឺបុគ្គលិកជំនាញបានខិតខំផ្តល់សេវាជូនភ្លាមៗ និងបានណែនាំយ៉ាងក្បោះក្បាយ ដើម្បីធានាបាននូវសុវត្ថិភាព ក៏ដូចជាភាពត្រឹមត្រូវនៃលទ្ធផលពិនិត្យសុខភាពរបស់ព្រះអង្គរួចរាល់ផងដែរ៕