រដ្ឋបាលខេត្តសៀមរាប ដាក់ឱ្យដំណើរការភ្លើងបំភ្លឺផ្លូវសាធារណៈ ៣៧០ដើម ចាប់ពីក្រុងសៀមរាប រហូតដល់ស្រុកពួក ខណៈពលរដ្ឋសំណូមពរឱ្យជួយកាត់មែកឈើបាំងពន្លឺភ្លើងពេលយប់

សៀមរាប៖ ដើម្បីឆ្លើយតបទៅនឹងតម្រូវការជាក់ស្តែង និងលើកកម្ពស់សុវត្ថិភាពក្នុងការធ្វើដំណើររបស់ប្រជាពលរដ្ឋ នាពេលថ្មីៗនេះ រដ្ឋបាលខេត្តសៀមរាប បានដំឡើង និងដាក់ឱ្យដំណើរការបង្គោលភ្លើងបំភ្លឺសាធារណៈសងខាងផ្លូវចំនួន ៣៧០ ដើម រួចរាល់ជាស្ថាពរ នៅតាមបណ្តោយផ្លូវជាតិលេខ៦ ចាប់ពីស្ពានទឹកវិល រហូតដល់ស្ពានស្រុកពួក ដែលមានប្រវែងសរុប ៧,៥ គីឡូម៉ែត្រ ។
គម្រោងស្ថាបនានេះ ធ្វើឡើងក្រោមការយកចិត្តទុកដាក់ខ្ពស់ពី ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ក្នុងគោលបំណងចម្បងដើម្បីកាត់បន្ថយអត្រាគ្រោះថ្នាក់ចរាចរណ៍នៅពេលយប់ ព្រមទាំងជួយបង្កើនសន្តិសុខ និងសុវត្ថិភាពយ៉ាងខ្លាំងដល់បងប្អូនប្រជាពលរដ្ឋក្នុងការធ្វើដំណើរ ក៏ដូចជាការប្រកបអាជីវកម្មផ្សេងៗនាពេលរាត្រីផងដែរ។

រដ្ឋបាលខេត្តសៀមរាបបានបញ្ជាក់ថា ការដាក់ឱ្យដំណើរការភ្លើងបំភ្លឺផ្លូវនៅលើកំណាត់ផ្លូវជាតិលេខ៦ នេះ គឺជា ជំហានទី១ ប៉ុណ្ណោះ ។ សម្រាប់ជំហានបន្ទាប់ រដ្ឋបាលខេត្តនឹងបន្តរៀបចំដំឡើងរហូតដល់ព្រំប្រទល់ខេត្តបន្ទាយមានជ័យ និងជំហានបន្តបន្ទាប់ទៀត ចាប់ពីស្រុកប្រាសាទបាគង រហូតដល់ព្រំប្រទល់ខេត្តកំពង់ធំ ដើម្បីពង្រីកវិសាលភាពសុវត្ថិភាពនៅទូទាំងខេត្ត ។

ទោះជាយ៉ាងណាក៏ដោយ ទន្ទឹមនឹងការអបអរសាទរចំពោះសមិទ្ធផលថ្មីនេះ ប្រជាពលរដ្ឋដែលធ្វើដំណើរឆ្លងកាត់ផ្លូវនោះ ក៏បានដាក់ជា សំណូមពរ និងព្រមានពីហានិភ័យលាក់ខ្លួនមួយចំនួន ផងដែរ ។

យោងតាមការលើកឡើងរបស់ពលរដ្ឋ ទោះបីជាមានការបំពាក់អំពូលភ្លើងបំភ្លឺផ្លូវហើយក្តី ប៉ុន្តែបច្ចុប្បន្នមាន “មែកឈើលូតលាស់លយមកលើផ្លូវ ឬបាំងអំពូលភ្លើង” ដែលបង្កជាស្រមោលងងឹត ។ កត្តានេះធ្វើឱ្យអ្នកបើកបរមានការពិបាកក្នុងការមើលឃើញសញ្ញាចរាចរណ៍ ឬមើលមិនច្បាស់ចំពោះអ្នកជិះម៉ូតូ និងកង់ដែលធ្វើដំណើរស្របគ្នា ដែលអាចងាយបង្កឱ្យមានគ្រោះថ្នាក់ចរាចរណ៍ជាយថាហេតុ ។

សេចក្តីរាយការណ៍បានសង្កត់ធ្ងន់ថា ដើម្បីឱ្យភ្លើងបំភ្លឺផ្លូវថ្មីនេះមានប្រសិទ្ធភាពខ្ពស់បំផុត អាជ្ញាធរពាក់ព័ន្ធ និងបងប្អូនប្រជាពលរដ្ឋដែលមានលំនៅឋានតាមដងផ្លូវ គួររួមសហការគ្នាត្រួតពិនិត្យ និងកាត់ជម្រះសម្អាតមែកឈើដែលលយបាំងពន្លឺទាំងនោះចេញ ដើម្បីធានាបាននូវសុវត្ថិភាពពេញលេញសម្រាប់អ្នកធ្វើដំណើរគ្រប់រូប ៕